Yaqinda kitobxon bolalarning sevimli maskani Respublika bolalar kutubxonasi zamonaviy ko‘rinishda yangi jihozlar, yangi zamonaviy axborot kommunikatsiya texnologiyalari bilan jihozlanib to‘liq ta’mirdan chiqarilib bolajonlarga tuhfa qilindi. Yangi qiyofadagi kutubxonaning ochilishiga Respublikamiz Prezidenti Shavkat Miromonovich Mirziyoyev tashrif buyurdilar.

Mutaxassis sifatida, kutubxonaning qariyb 50 yillik do‘sti, O‘zbekiston Respublikasi Fanlar akademiyasi Fundamental kutubxonasi direktori, axborot kutubxona a’lochisi Berdiyeva Zuhra Shukurovna kelib kutubxona faoliyati bilan tanishib chiqdi. Kutubxona bilan kutubxona direktori O‘rolov Doniyor Omonovich tanishtirib bordi. Kutubxona havas qiladigan darajada, bolalarning diqqat e’tiborini tortadigan darajada yangi qiyofaga ega bo‘libdi. Turli ko‘rinishda, turlicha jihozlar bilan ta’minlangan o‘quv xonalari mavjud, tadbirlar o‘tkazish xonasi, audiokitob o‘qish zallari, kutubxonaning xodimlar uchun alohida xonalar, ota onalar uchun ham alohida shart-sharoitlar mavjud. Faqat ota-onalar farzandlarini yetaklab kutubxonaga olib borib, kitob o‘qishga qiziqtirsa, o‘qish qoidalarini tushuntirsa bo‘ldi. Yangi qiyofadagi kutubxona bilan tabriklaymiz. Tilagimiz yanada kitobxonlar ko‘p bo‘lsin, bolalari orqasidan ota-onalar ham faol kitobxonga aylansin!