Bugun, 14-fevral kuni jahon tarixida o‘chmas iz qoldirgan buyuk shoir, qomusiy olim, davlat arbobi va iste’dodli sarkarda – Zahiriddin Muhammad Bobur tavalludining 543 yilligi keng nishonlanmoqda.

U nafaqat yirik davlat arbobi va sarkarda, balki betakror iste’dod sohibi, nozik didli ijodkor sifatida ham tarix sahifalaridan munosib o‘rin egallagan. Bobur qalamiga mansub Boburnoma asari jahon adabiyoti va tarixshunosligining nodir durdonalaridan biri hisoblanadi.

Shu munosabat bilan Fanlar akademiyasi Fundamental kutubxonasida “Bobur – shoh va shoir” nomli kitob ko‘rgazmasi tashkil etildi. Ko‘rgazmada Boburning hayoti va faoliyatiga oid ilmiy, tarixiy va badiiy adabiyotlar, uning boy ma’naviy merosini yorituvchi asarlar to‘plangan.

Mazkur ko‘rgazma buyuk ajdodimizning serqirra faoliyati, ilm-fan va adabiyot rivojiga qo‘shgan beqiyos hissasini yana bir bor yodga olish, yosh avlod qalbida milliy g‘urur va vatanparvarlik tuyg‘ularini mustahkamlashga xizmat qiladi.