Bugun, 9-aprel – buyuk davlat arbobi, mohir sarkarda Sohibqiron Amir Temur tavallud topgan kun! Amir Temur ibn amir Tarag‘ay 1336-yil 9-aprelda Kesh (hozirgi Shahrisabz) shahri yaqinidagi Xo‘ja Ilg‘or qishlog‘i (hozirgi Yakkabog‘ tumani)da dunyoga kelgan. Uning otasi Amir Muhammad Tarag‘ay barlos ulusiga mansub beklardan, bahodir jangchi, ulamoyu fuzaloga ixlosmand, ilm ahliga homiy va ishtiyoqmand kishi bo‘lgan.

Amir Temurning yoshligi haqida ma’lumotlar kam uchrasa-da, ayrim manbalarga qaraganda, u yoshligida xat-savod chiqarib, o‘z davrining tibbiyot, riyoziyot, falakiyot, me’morchilik va tarix ilmlarini o‘rgangan.

Amir Temurning ibratli hayot yo‘li va adolatli siyosati bugun ham yoshlarimizda g‘urur va vatanparvarlik tuyg‘ularini uyg‘otmoqda.