О‘zbekiston davlat san’at va madaniyat institutida “Kutubxona-axborot faoliyati” kafedrasi tomonidan Turon Fanlar akademiyasining faxriy akademigi, “Kutubxona a’lochisi” kо‘krak nishoni sohibasi, О‘zbekiston Fanlar Akademiyasi Fundamental kutubxonasining direktori Zuhra Beridiyeva ishtirokida uchrashuv bо‘lib о‘tdi.

“Sohamiz fidoyilari” turkumi ostida tashkil etilgan mazkur ma’rifiy tadbirda institut professor-о‘qituvchilari va talabalari qatnashdilar.

Uchrashuvda Zuhra Beridiyeva kutubxonachilik sohasida davlatimiz tomonidan olib borilayotgan islohotlar xususida gapirar ekan, ushbu kasb, uning jamiyatda tutgan о‘rni va roli haqida, qolaversa yoshlarni vatanparvarlik ruhida tarbiyalashdagi ahamiyatiga alohida baho berdi.

Shuningdek, notiq Fundamental kutubxonasi tomonidan bugungi kunda qilinayotgan ishlar bilan tanishtirdi. Xususan “Akademik Azizxon Pо‘latovich Qayumov bibliografiyasi”, “Alisher Navoiy bibliografiyasi”, “Erkin Vohidov bibliografiyasi”, “Bobur va Boburiylar bibliografiyasi”, “Abdulla Qahhor bibliografiyasi” kabi kо‘rsatkichlarning tayyorlanish tarixi va nashr etilishiga bog‘liq qiziqarli ma’lumotlarni taqdim etdi.

Uchrashuv yakunida talabalar о‘zlarini qiziqtirgan savollariga javoblar oldilar. О‘ylaymizki, mazkur ijodiy uchrashuv talabalarni kutubxonachilik kasbini egallashda va ularning ilmiy izlanishlarida muhim poydevor bо‘lib qoladi.